ACOUGO no sistema educativo de Galicia

A colaboración entre ACOUGO e a Consellería de Educación, Ciencia, Universidades e Formación Profesional nace do compromiso compartido de mellorar a atención educativa do alumnado que se atopa en situación de vulnerabilidade socioeducativa e de promover contornas educativas máis inclusivas, seguras e respectuosas coa diversidade.

O convenio subscrito entre ambas entidades establece un marco de colaboración estable para desenvolver accións de sensibilización, formación e acompañamento dirixidas á comunidade educativa galega.

Esta colaboración responde á necesidade de ofrecer unha atención integral ao alumnado con necesidades específicas de apoio socioeducativo, promovendo a participación de entidades especializadas que contribúan a mellorar a súa inclusión, participación e benestar dentro do sistema educativo.

Sensibilización nos centros educativos

Desde ACOUGO desenvolvemos accións de sensibilización dirixidas a toda a comunidade educativa e, de maneira especial, ao alumnado das diferentes etapas educativas, co obxectivo de achegar a realidade do acollemento familiar e promover o coñecemento dos dereitos da infancia.

A través destas actividades fomentamos valores como a empatía, a solidariedade, a corresponsabilidade e o respecto á diversidade familiar, contribuíndo á construción dunha cultura de protección, bo trato e compromiso coa infancia.

Contacontos e actividades educativas

Entre os recursos que ofrecemos aos centros educativos destaca o libro dos Bolechas sobre acollemento familiar, acompañado dunha unidade didáctica que facilita o traballo destes contidos nas aulas.

Este material está a ter unha excelente acollida nas etapas educativas máis temperás, permitindo abordar cuestións como os vínculos afectivos, a protección da infancia, a empatía, a diversidade familiar e o dereito de todos os nenos e nenas a medrar nun entorno seguro e protector, dunha maneira sinxela, próxima e adaptada á súa idade.

Día do Pixama

Cada ano, arredor do 20 de novembro, coincidindo coa celebración do Día Mundial da Infancia, ACOUGO participa xunto con ASEAF na organización do Día do Pixama.
Esta campaña estatal busca sensibilizar á comunidade educativa sobre o dereito de todos os nenos e nenas a medrar nun fogar e dar visibilidade á realidade da infancia que forma parte do sistema de protección.

Os centros educativos participantes reciben materiais didácticos e desenvolven actividades específicas nas aulas. Ademais, desde ACOUGO realizamos charlas de sensibilización para achegar ao alumnado e ao profesorado a realidade do acollemento familiar e a importancia do compromiso social coa infancia.

Formación para o profesorado

O convenio recoñece tamén a importancia da formación especializada dos profesionais da educación para favorecer unha resposta educativa adecuada ás necesidades do alumnado que se atopa vinculado ao sistema público de protección á infancia, xa sexa a través do acollemento familiar, o acollemento residencial ou outras medidas de protección.

Por este motivo, ACOUGO ofrece accións formativas adaptadas ás necesidades de cada centro educativo, abordando cuestións como:

• O impacto da adversidade temperá e do trauma no desenvolvemento infantil.
• As necesidades específicas das crianzas e adolescentes en acollemento familiar.
• A teoría do apego e a construción de vínculos seguros.
• A regulación emocional e a comprensión das condutas complexas.
• As dificultades de aprendizaxe derivadas de experiencias adversas.
• A creación de aulas e centros sensibles ao trauma.
• Estratexias de acompañamento educativo e emocional.
• A coordinación entre os centros educativos, as familias acolledoras e os sistemas de protección.
• A diversidade familiar e a súa incorporación á práctica educativa.

O obxectivo destas formacións é dotar aos profesionais da educación de ferramentas que lles permitan comprender mellor a realidade deste alumnado e converter a escola nun espazo de seguridade, pertenza, inclusión e oportunidade.

Un compromiso compartido coa infancia

Este convenio supón un paso máis no compromiso de ambas institucións coa protección da infancia e coa atención á diversidade educativa.

A colaboración entre o sistema educativo e ACOUGO permite avanzar cara a unha sociedade máis consciente, máis inclusiva e máis comprometida co dereito de todos os nenos e nenas a crecer nun entorno familiar seguro e protector.

Porque protexer a infancia é unha responsabilidade compartida. E porque educar tamén é acoller.