Corresponsables
As seguintes actuacións lévanse a cabo porque se detectan carencias e necesidades sobre conciliación e corresponsabilidade que afectan nomeadamente a familias acolledoras, tendo en conta que esta medida do acollemento familiar é por excelencia a definición de coidados alternativos, ademais que parten dun acordo formal coas Administracións Públicas, tanto en familia extensa como en familia allea, en calquera das distintas modalidades de acollemento familiar.
Se hai un colectivo vulnerables entre os vulnerables, é o colectivo da infancia e adolescencia do sistema de protección, entre o que atopamos crianzas con necesidades especiais dende todos os puntos de vista do desenrolo físico, emocional, afectivo, social, educativo, etc. Os seus dereitos deben ser atendidos, e un dos fundamentais é o dereito a medrar en familia.
Por iso, dende o ministerio de Igualdade, a través dos fondos do plan corresponsables, e coa precisión da Xunta de Galicia para poder executar con proxectos concretos estes fondos, dende ACOUGO puxemos en marcha una serie de medidas de acción, actividades e servizos, que fan posible que se traballe poñendo o foco na importancia da corresponsabilidade a igualdade e os coidados alternativos centrados nas necesidades das persoas, tanto das coidadas como das que coidan.
No ano 2024, continuamos co traballo desenvolvido en ACOUGO en materia de conciliación, corresponsabilidade e coidados alternativos, poñendo o foco nas necesidades das persoas, especialmente das nenas, nenos e adolescentes do sistema de protección público. Este esforzo conta co apoio das Administracións públicas, tanto a nivel europeo, estatal como autonómico.
Grazas ás convocatorias de financiamento do “Plan de Recuperación, Transformación e Resiliencia”, os fondos “Next Generation da Unión Europea” e o “Plan Corresponsables” do Ministerio e da Consellería de Política Social e Igualdade, traballamos en sensibilización, difusión e formación. Ademais, ampliamos e diferenciamos as actividades e servizos executados en 2023 en dúas liñas de financiamento e execución, para dar unha resposta máis integral e adaptada.
Convenio
A Asociación Galega de Familias de Acollida, ACOUGO, uniuse ao programa “Acollemento corresponsable 2024” como parte do seu compromiso coa protección da infancia en Galicia e o apoio ás familias de acollida. Este convenio, desenvolvido no marco do Plan Corresponsables promovido pola Dirección Xeral de Igualdade, busca fomentar a conciliación e a corresponsabilidade dentro das familias, especialmente en contextos de vulnerabilidade social e económica.
ACOUGO detecta continuamente necesidades específicas tanto nas familias de acollida como nas de orixe, especialmente aquelas encabezadas por mulleres en situacións de risco. Mediante este programa, búscase abordar desigualdades de xénero persistentes no ámbito dos coidados, ofrecer apoio estruturado e fortalecer os vínculos familiares. O obxectivo é garantir os dereitos fundamentais dos nenos e adolescentes do sistema de protección, facilitando o seu crecemento en contornas familiares estables e seguras.
As actuacións previstas inclúen iniciativas de acompañamento, apoio e empoderamento que non só benefician directamente ás familias, senón que tamén contribúen ao desenvolvemento dunha sociedade máis inclusiva e corresponsable. Este enfoque integral reforza a capacidade de ACOUGO para cumprir a súa misión de promover unha crianza familiar inclusiva e equitativa, aliñándose cos obxectivos do convenio e coa Estratexia Estatal de Desinstitucionalización.
Subvención
A Asociación Galega de Familias de Acollida, ACOUGO, únese ao “Plan Corresponsables” para promover a igualdade de xénero e facilitar a conciliación mediante canguraxe e formación en corresponsabilidade. Estas iniciativas buscan apoiar as familias de acollida, especialmente a familias monoparentais, fomentando a idea de que o tema dos coidados alternativos non son unha cuestión só de mulleres.
Apoiando as familias acolledoras na cuestión de conciliación como medida de discriminación positiva para que haxa cada vez máis familias dispostas a acoller e a cumprir coa corresponsabilidade social que as Nenas, Nenos e Adolescentes do sistema de protección necesitan.
Estes servizos de canguraxe ofrécense con persoal propio da entidade e con formación e experiencia específica que abordan as necesidades das NNA con feridas de trauma e abandono, algo moi valorado para as familias acolledoras.
O programa fomenta a sensibilización desde idades temperás para previr estereotipos de xénero, fortalecer o acollemento familiar como alternativa á institucionalización e garantir os dereitos dos menores para crecer nunha contorna familiar inclusiva e equitativa.
Actividades
No ano 2023 Acougo firma coa Consellería de Promoción do Emprego e Igualdade un convenio no que se inclúen as seguintes actuacións:
- Conciliación e respiros familiares.
- Formación en corresponsabilidade.
- Sensibilización en conciliación e corresponsabilidade.
