Webinar informativa sobre o acollemento familiar en Galicia

Dende ACOUGO queremos convidarte a unha webinar informativa sobre o acollemento familiar en Galicia, un espazo pensado para achegar á cidadanía a realidade do acollemento e resolver dúbidas sobre como funciona este recurso de protección para nenos, nenas e adolescentes.

Durante a sesión falaremos sobre que é o acollemento familiar, que tipos existen e como poden implicarse as familias que senten que poden ofrecer coidado, estabilidade e acompañamento a un neno ou nena que o necesita. Será tamén un momento para coñecer de primeira man como é o proceso e poder formular preguntas.

Ademais, nesta webinar presentaremos un proxecto piloto:

O acollemento a través do plan simultáneo e de dobre propósito está dirixido a nenos e nenas con idades comprendidas entre os 0 e os 6 anos, co obxectivo de protexer ao máximo o seu desenvolvemento emocional e estabilizar a súa convivencia nun contorno familiar, minimizando cambios.

Para iso iníciase un plan de traballo simultáneo no que se procura a recuperación da familia de orixe, ao mesmo tempo que se traballa coa familia acolledora, de maneira que, se a reunificación non é posible, o neno ou nena poida permanecer de forma definitiva nese contorno.

Para iso búscanse familias acolledoras cunha disposición flexible, é dicir, con dispoñibilidade para converterse nunha opción permanente e definitiva se a reunificación non é viable.

Trátase dun proxecto piloto de nova creación para a desinstitucionalización, que se pon en marcha en varias comunidades, e as familias non poden estar activas en ningún outro proceso de acollemento.